Propaganda, kjo paradhomë varresh
Propaganda, kjo paradhomë varresh
24.01.2023 | 04:23
Përkitazi me filmin ‘Triumph of the Will’, të regjisores Leni Riefenstahl

Dritan Dragusha

Zigmund Baumann-i dikur thoshte se: “Njerëzit janë prodhues të përfytyrimeve të ideve të tyre”. Në këtë kontekst lirisht mund të themi se filmi Triumph of the Will, është përfytyrim i ideve naziste që shumë shpejt do të bëhen tmerri real i njerëzimit. Gjithçka që shfaqet në këtë film ka një qëllim. Thuhet se ideologjia çdoherë fillon si fantazi, por me qëllimin e përhershëm që të bëhet realitet. Andaj, filmi Triumph of the Will e shprehë realitetin e fantazisë së Gjermanisë naziste që do të shpërfaqet në vrasje masive.

Nëse dëshirojmë ta kuptojmë se cila është fuqia e propagandës, e që në këtë rast si instrument i saj bëhet arti, konkretisht kinemaja, atëherë kjo na kristalizohet tek ky film. Madje, ka një rrëfim që aludon se ishte po ky film, pra, filmi Triumph of the Will, që është një demonstrim i pastër i fuqisë së kinemasë, që i dha dhe ia rriti madhështinë nazizmit. I realizuar më 1934, nga regjisorja Leni Riefenstahl, Triumph of the Will do të bëhet emblema e paradave vrastare në masë.


Filmi qëllimshëm ishte realizuar në kongresin tre-ditorë që po mbahej në Nuremberg nga partia naziste. Triumph of the Will është shembulli i propagandës në historinë e kinemasë. Tema qendrore e filmit e pasqyron Hitlerin si udhëheqës shumë të fuqishëm dhe rikthimin e Gjermanisë si një superfuqi botërore. Prandaj, nga shumë teoritë, por edhe kritik të ndryshme, ky film konsiderohet edhe si një nga shtysa më serioze të ngritjes së Hitlerit në pushtet dhe forcimit të tij dhe partisë naziste.

Triumph of the Will, është një nga filmat që fundamentohet në ideologjinë e Gjermanisë naziste. Ai paraqet njeriun gjerman jo si ishte në fakt, por si duhej të dukej në të ardhmen. Pra, ky film operon mes fantazisë dhe realitetit. Ideologjizimi i skajshëm këtë film e bënë edhe ikonë të propagandës. Aty janë të theksuar oratoria e udhëheqësve nazist me në krye Hitlerin, rregulli ushtarak, muzika trumbetuese e Richard Wagner-it dhe Herbert Windt-it. Një ikonografi që shprehë fuqinë dhe frikën. I realizuar sipas skenarit të Hitlerit, ky film ishte edhe një paralajmërim ogurzi për të tjerët. Në Triumph of the Will paraqitet një rend i ri i cili po ndërtohej në atë kohë në Europë. Aty projektohet Gjermania e së ardhmes. Gjithçka që paraqitet në këtë film duket e përkryer dhe e errët njëkohësisht.

Filmi Triumph of the Will, është edhe kujtesa historike e vetë kinemasë. Për këtë, nga ky film duhet të mësojmë se si duhet të jemi vigjilent ndaj përdorimit të kinemasë dhe medias dhe artit në përgjithësi, sepse ky film tregon më së miri se si kinemaja më shumë se sa shfaqje e artistikes, bëhet mirëmbajtëse dhe fuqizuese e propagandës ideologjike dhe makinerisë vrastare. Triumph of the Will është simboli i një realiteti vizuel, që u bë realiteti më brutal i shekullit XX. Ky film, paradoksalisht, është edhe një pasqyrë se si nuk duhet bërë art, se si nuk duhet arti, e në këtë rast kinemaja, të bie në shtratin e errët të ideologjisë.